PROGRAM
Dag 1: Kaapstad na die Paarl : Zomerlust Gastehuis DBB
Aankoms vanaf Kaapstad in die Paarl, een van die oudste dorpe in Suid Afrika. Die Paarl is geleë in 'n vallei tussen wingerde en berge en die Bergrivier wat deur die omgewing vloei. Die streek in die Wes-Kaap staan as die Boland bekend.
Die Paarl is ook die enigste plek in die wêreld met so 'n prominente Taalmonument wat opgerig is, ter ere van die Afrikaanse Taal.
'n Besoek aan die Paarlberg via die Jan Phillips bergpad, onder leiding van 'n plaaslike kundige. 'n Interaktiewe ervaring van plaaslike fynbos, wye uitsigte en pragtige natuurskoon oor feitlik die hele Boland. As deel van hierdie ervaring, word die Taalmonument met sy unieke geskiedenis, pragtige tuine en plantegroei besoek, waar 'n ligte middagete/piekniek genuttig kan word.
Middagete: Opsioneel ekstra
Oppad vanaf die Taalmonument word 'n besoek gebring aan nog 'n welbekende baken van die Paarl, naamlik die KWV. 'n Besoek aan die KWV Wyn Emporium gee die besoeker 'n insig in 'n grootskaalse, koöperatiewe bedryf tydens 'n begeleide keldertoer en wynproe.
Nou wag Zomerlust Gastehuis, waar heerlik ontspan kan word en die skoonheid van die tuine en geskiedenis van hierdie besonderse historiese landgoed in die historiese dorpskern ingeadem kan word.
'n Tradisionele 'Kontrei' aandete by Zomerlust in die mooi tuin of die historiese hoofgebou sal almal laat ontspan voor 'n heerlike nag se slaap in hierdie ouwêreldse milieu.
Dag 2: Zomerlust Gastehuis DBB
Zomerlust
Gastehuis
|
Na ontbyt, onderneem 'n twee-uur lange Paarl 'straat-stap' saam met 'n kleurryke, boeiende, plaaslike kenner van die Paarl se geskiedenis.
Hierna, sal die besef deurdring dat die Paarl eintlik 'n juweel is waarvan al sy fasette nog nie ontdek is nie...
'n Belewenis van 'n heel ander aard lê nou voor. Daar word besoek gebring aan Mbekweni, waar kennis gemaak word met 'n meer tradisionele Afrika-gevoel, midde in die kontrei, waar middagete genuttig word. Ervaar die Afrika-kultuur van voedsel en drank. Middagete ingesluit. Alkoholiese drank en koeldrank opsioneel ekstra.
Hiervandaan ry ons na Welligton.Die volgende kontrei ervaring aan die voet van die Limietberge, is kennismaking met persoonlike, kleinskaalse produksie. Ons besoek 'n wynlandgoed waar die eienaar 'n plaas/wingerd/kelder/proe gaan aanbied. U volg die proses van wingerd tot in die bottel! Proe die pot gedistilleerde brandewyn en grappa.
Hiervandaan verder in die Bovlei kontrei van Wellington, doen ons aan by 'n historiese plaas, vir 'n wynproe geleentheid in die pragtige tuin, waar die wynmaker almal op 'n heerlike wyn-reis neem...
En... indien die voete na die hele dag se gebeurlikhede nie te moeg voel nie, besoek ons 'n leerwinkel, waar alle leerware met die hand gemaak word. Ontmoet die eienaars en geskoolde werkers wat die egte produkte laat vorm aanneem.
Hierna weer huiswaarts, na Zomerlust Gastehuis, waar 'n heerlike aandete met nog 'n verskeidenheid plaaslike resepte wag.
Dag 3: Paarl-Kaapstad via Franschhoek
Op die 3de dag, na ontbyt, besoek ons 'n werkende Olyfplaas in die Klein Drakenstein omgewing van die Paarl.
'n Besoek word ook aan Drakenstein Korrektiewe Dienste, waar 'n standbeeld van oud president Nelson Mandela is, gebring. Hier kry u 'n verduideliking van die simboliek van die standbeeld en mnr Mandela se geskiedenis tydens sy verblyf by die destydse Victor Verster Gevangenis.
Nie ver hiervandaan nie, lê Franschhoek met sy 'Franse Flair' tussen die berge. Geniet 'n ligte middagete in die interessante hoofstraat, met sy vele koffie winkels, restaurante en toeriste aantreklikhede. Ons maak 'n foto-stop by die Hugenote Monument en ry oor Helshoogte na Stellenbosch.
Die laaste wynlandgoed is 'n historiese plek met 'n intieme ou kelder met kampioenwyne, 'n kunsgalery met werke van vorige eienaars en 'n gesprek met die eienaar oor die plaas tradisie. Ons sê totsiens, maar nie vaarwel nie, aan die "Paarl-Kontrei" en besorg u laatmiddag in Kaapstad.
